BNG Cangas: Solicitude convocatoria urxente da comisión de urbanismo e xunta de portavoces Para información e acordos urbanísticos asi como información directa aos afectados polo plan de mobilidade viaria do morrazo

O BNG de Cangas presentou varios rogos e preguntas relativas a temas urbanísticos de suficiente importancia para ter convocado unha xunta de portavoces e a comisión de urbanismo sen que por parte do goberno municipal se tiveran en conta e sen resposta algunha por parte do sr. alcalde.

O BNG, mostrando a súa preocupación polo curto período de exposición pública do Plan Viario do Morrazo e pola falta de información directa aos afectados instou ao goberno municipal á solicitude de ampliación de prazo de exposición do proxecto, sen ter resposta directa por parte do goberno e a alcaldía que pretende ignorar a segunda forza política deste concello que está a presentar iniciativas serias e necesarias, e tras un acordo no mesmo sentido por parte da corporación municipal do concello de Moaña, semella que a nosa demanda, coincidente coa comisión de Afectados polo Proxecto de Circunvalación, foi tomada en consideración e que a Consellería ampliará o prazo ata o vindeiro 28 de setembro segundo a información recollida nos medios.

Máis este grupo municipal entende que é necesario e urxente a convocatoria da xunta de portavoces e unha comisión de urbanismo para tratar este tema onde se acordaría un calendario de xuntanzas informativas cos

afectados e técnicos da consellería e municipais para unha información clara e acordos relativos ás alegacións que este concello debe presentar a este proxecto.

Este grupo municipal reitera as súas solicitudes para súa resposta escrita e urxente tramitación, considerando fundamental dar pasos nos seguintes sentidos:

Solicitude do goberno municipal á Consellería da posta a disposición de técnicos da mesma para información aos grupos políticos, colectivos sociais e afectados.
Convocatoria dunha Xunta de Portavoces e a Comisión de Urbanismo co fin de acordar as alegacións que a corporación poida presentar no período de exposición pública así como o estudo de novas propostas de viais e/ou melloras no proxecto.
Acordo na Xunta de Portavoces de un calendario de xuntanzas informativas, propoñendo o auditorio municipal coma primeira localización no prazo non superior a 5 días, coa presenza dos técnicos da Consellería e municipais para explicación aos veciños e veciñas e colectivos sociais do Plan de Mobilidade Viaria do Morrazo.
Convocatoria da Xunta de Portavoces para tratar á solicitude da Comisión de Afectados polo Proxecto de Circunvalación incluido no Plan de Mobilidade Viaria do Morrazo.